Eng nge a nih kan hriat ve hma pawhin chhiarsen loh tam takin an lo tuar tawh ṭhin a, kan hriat phâk chinah ringawt pawh hei zât hian an tuarin, mi tam tak an liam tawh. Heti anga nitin a thâwm kan hriat, engtiklai pawha min chenchilh tlattu hi thil dang chu ni se, ngaia kan neih mai mai tur, kan thlir liam mai mai tawh tur thil a ni. Nimahsela, thil dang ni lovin ‘thihna’ a ni miau va, tu tan mah ngaia neih mai mai chi a ni awzâwng lo - a na!
Ral leh tura duan hringchan tisa, vaivuta kir leh tur thuam inbelin kan lo piang chhuak a. He kan chenna leiah hian kumhlun tur pakhatmah a awm lo tih hi ‘ka beng’ tih tlukin kan hrechiang hlawm. Amaherawhchu, he thil, kan hriat sa vek tluka min khawih na ṭhintu hi a awm si lo! A la tuar tam lo tan a na a, a tuar ṭhang tawh tan pawh a thawh dan a dang chuang hek lo - a na!
Chhum reilotê lo lang a, ral leh mai ṭhin ang nun neitute kan nihna pawh Pulpit tlângah kan aupui dum dum a. Vawi khat tluk sual palh hlek pawha kan hringnun kawng zawh lai hi tawp thei reng a nih thu leh kan nunna derthawnzia chen hian tu fa mah hi hrilh nawn kan ngai lo. Boral tura duan nunna nei vek kan ni tih kan hre bel hle chung hian a tur ve renga dah hi chu a harsa a ni tiraw? Ni e, eng ang pawhin boral leh tur kan ni tih hre reng mah ila, engmah a danglam phah lo - a na!
Thihna kut vâwt chuan kan vêl a dap reng a. A duh apiang a kai a; keini’n kan duh avanga kan lo dan theih a ni hlek si lo. Kan la thlakhlelh ngawih ngawihte chen hian he thihna nunrawng hian min la chhuhsak ang a, “a la hun lo asin” tiin kan inthlah zel dawn a nih hi. Kan ngaih em em, kan ṭhenrual ṭha te pawh hian ‘hun lo takah’ mual min la liamsan thut thut ang a. Keini ngei pawh hi engtikah emaw chuan hringnun kan mangṭhana ni chu ‘hun lo takah’ a lo la thleng ve ang! Amaherawhchu, hei erawh a chiang: engtiklai pawha ‘a la hun lo asin’ kan tih reng tur thihna hi tu tan pawh - a na!
(0401201122130)
No comments:
Post a Comment