Fiction : A va na dawn em!

Tlai lama nitla turin hê zeta khawvel a rawn chhun suar suar tawh hi chuan amah chauhvin an veranda-ah chuan a ṭhu ṭhin a. Amah lo hmu a, lo hre ṭhang tawh te phei chuan a tur ve rêng emaw an tihsak tawh hial a. Zan lamah pawh ni se, zan a rei telh telh a, thenkhatte tui em em-a an mutthilh bawrh bawrh tawh laiin ani erawh chu a harh telh telh a; a rilru ngaihtuahna pawh a fim telh telh emaw tih mai tur a ni. Heti ang hian zantin hun a hmang ṭhin a. Zâi a ngaithla a, zankhaw tairek thlengin a suangtuahna khawvelah a chêng a, hun liam tawh hnu chhuikirin a tlaivar leh nge nge ṭhin. 

Awm lo a nghâk a, kir leh tawh ngai lo tur chu a beisei ṭhin! Chuti ang reng reng chuan hun leh ni a chhiar liam a. A tan chuan ni thar hian chona a siamsak ve lo va, hun inher zel hian ṭahna bak a thlen sak ngai hek lo; hringnun hi anchhia-ah a chang zo va, nun hian hlutna rêng a nei tawh lo.


Midang tan chuan zing ni chhuak hian chona thar siamsakin, tlai ni tla hian hun hlui chu a liampui ṭhin a ni ngai a. Mahse, ani tan erawh chuan chona thar chu sawi loh, tlai ni tla meuh pawhin a hun hlui chu a liampui ve thei si lo. Zingkâra ni lo chhuak hian a hmangaih ber nena an hlimlai hunte kha a thinlungah chiang em ema rawn tuh thar lehin, tlai ni tla hian chu an nunhlui a chhuikir ṭhinna thinlung chu a liampui bawk hek lo. Nitin a thar deuh deuh a, theihnghilh a tum nasat poh leh a zual zel zâwk emaw tih mai tur a ni. 

Zan lamah pawh a tan chuan engmah a danglam ve ngai lo. Zan thim chhah ber pawhin a thinlunga ‘mi pakhat’ awm reng hliah thei tur khawpin theihna a nei lo va. Hmâna a lo hlimpui em em ṭhin thla êng no nghelh mai pawh khian, a hmangaih berin a kalsan ták aṭang kha chuan hmelma chan a chang ta thung si a. Tunah zet chuan thla êng mawina thlir tura van lam han melh tur pawhin huaisenna rêng a nei tawh lo va; mi pakhatin a kalsan ták, a thinlung ruak leh khawhar zetah chuan dawihzepna chuan ro a rel ta si. Thla êng mawina leh duhawmna pawh hi ṭhenkhat chuan hahipin an sawi ṭhin a, thû leh hlâ-ah pawh an chawi nasa narawh e; amaherawhchu, heti ang zawng zawng pawh hi a thlirtu thinlung azira danglam thei a ni ve mai ang em? Ani tan chuan zan thla êng kulh mai hian hlutna rêng a nei ve tawh lo va, duhawmna leh mawina thuam pakhat mah a inbel ve tawh hek lo. Lunglênna mittui a bianga luantirin, natna bák a thlen sak tawh si lo va. 

He dinhmun hi ama duhthlanna avanga a neih tur chu ni se, engti kawng mahin a thlang bik lo vang. Amaherawhchu, a chan tura Khuanu’n a lo ruat lâwk tawh sa a nih miau avangin a duh vang ringawta pumpelh mai mai theih a ni si lo. Hmangaihna vang vek! 

Ni e, hmangaihna hi zawng a lo mak a ni. Ṭhenkhat tan chuan beidawnna khur thûk tak ata khai chhuak a, beiseina pâr vul tirtu, mittui hru hula hlimna thlensak ṭhintu a nih mêk lai hian ṭhenkhat tan erawh anchhia, hma lam hun lo kal leh zel tur thlenga tichhe theitu a ni lawi si! Ani ngei pawh hi hmangaihna chuan a duh lohna ber kawng zawh turin a bânah a kai a, tal chhuah theih rual lohvin a chelh nghet tawh si a. 

A ṭhenrual ṭhate hnen aṭang pawhin tawrhpuina leh a hma lam hun atana duhsakna thu pawh a dawng ve ṭhin tak ná a, a tan chuan engkim mai hi thâwm bengchheng an chang zo tawh a. Ṭhenkhatin duhsak taka, “Tuar hram hram rawh, khuareiin a la hnem ve mai ang che. Nakinah ani aia ṭha zawk ila tawng leh ngei ang; heti ang te chu midang pawhin an tawng fo va,” ti-a an hnemna ṭawngkam pawh thu awmze nei lo mai a ni! A thinlung a tuiral zo tawh a, a rilru natna chu tu hriatthiampui chi mah a ni lo. A hmangaihna ramri chu zim takin a lo hung fel diam tawh a; a chhûngah chuan mi pakhat chiah a leng! Chu ramri zimtê-ah chuan midang an tlazep leh thei tawh ang em ni? 

Hlim taka a nuih ṭhin lai khan a la ṭap dawn tih lo hre láwkin, a hmangaih ber bula hlim leh lungawi taka a awm lai khan, amah chauhva awm turin a kalsan leh dawn a ni tih lo hria se la; hlimna a thlen ve ṭhin emaw a tih lai khan, a tan hlimna tak tak a lo thlen thei reng reng lo a ni tih lo hria se la chuan, mitkhapkar leka ral leh mai tur hmangaihna inṭawm kha a duh ngai lo tur! Mahse chu zawng, duhthusam ram mai a ni tawh a, tûnah erawh chuan se bo hnua se kawng khar ang hlauh a ni tawh si. 

Hmangaihna chuan hmangaihtu thinlung a hliám a, a tuartu tan chuan a va na dawn em! 

(170120120321)