Tuesday, 6 March, 2012

Putara Diary

Ralkhat aṭanga thlir pawhin chu in (house) chu mi awmthei tak chenna hmun a ni tih a hriat theih nghal mai a. A chhehvêlah kawtzâwl zau nuam tak a inpharh duai bawk a. A hmu tawh phawt chuan chu hmun chu eng emaw chânga hawi khawthawn nan leh hahchawlhna atana an it thu an sawi ṭhin reng a ni. 

Chu in hualvela kawtzâwl zau nuam takah chuan pangpar a vul chêk a; ṭhut hahdamna tur ṭhutthleng thinga siam a awm nual bawk. Chu ṭhutthlenga ṭhu chung chuan tlangval pakhat, kum 25 mi vel hian nichin lawka lo thleng thar chanchinbu hlai tawk tak chu thingpui no dawm pahin a chhiar mual mual a. A chhehvêlah sava chi hrang hrang an lo hram chiah chiah bawk a. 

Rei vak lovah in chhûng aṭang chuan pa upa lam tawh, amah hrechiang deuhtute chuan 'Putara' ti-a an koh mai ṭhin hi a rawn chhuak a. Chu Putara chu han en mai pawhin pa nelawm, rilru nghet chet chawt, ngaihdan sawhsawn ngai zen zen lo, fin hmel tak hi a ni roh va; a chal erawh tu emaw ang deuhvin a thui ve tawh hle! Ngawi rengin tlangval ṭhutna lam chu a pan a. Chu tlangval bulah chuan eng emaw ngaihtuah neih hmel takin a ṭhu ve chawt a. A melh ngai a melh ngur ngur a, a kuangkuah run bawk a. 

Rei fe inbe hauh lova an ṭhutdun reng hnu chuan Putara chuan thingzâr lam chu a kâwk a, tlangval hnenah chuan zawhna a zâwt ta a.

"Khi khi engnge ni le?" 

Tlangval chuan a chanchinbu chhiar mek ata a mit lasawnin thingzâr lam chu a han melh a, "Chawngzawng a nih khi," tiin a chhang a. Eng dang sawi chhunzawm lovin a chanchinbu chhiar lai bawk chu a bih chhunzawm nghal a. 

A hnu rei vak lovah chuan Putara chuan a zawhna ngai bawk chu a zâwt leh a,"Khi khi engnge ni le?" 

Tlangval chuan Putara hnenah chuan, "Ka pa, ka hrilh tawh che kha, Chawngzawng ka ti zo chiah a ni lo'm ni?" tiin a lehzawh a. 

A pa Putara chu a nui suk a, a lu a bu nghut nghut a. A zawhna ngai bawk a zâwt leh ta ngat a, "Khi khi engnge ni le?" 

Chu tlangval chu a pa zawhna chuan a tilungawi lo hle tih hriat takin a awki a sàn a, "Chawngzawng, ka pa Chawngzawng a nih khi, CHAWNGZAWNG!" 

Putara chuan engtin mah a chhang lêt lo, a zawhna ngai thovin a chhunzawm leh a, "Khi khi engnge ni le?

 A fapa chu a sa ta phat mai! A pa hnen aṭanga zawhna ngai hlir vawi 4 lai a dawng chu a hrethiam thei lo va. A pa mah ni se, a insumtheihna-in a tlin tawh lo, insah deuh sawk sawk pawh a hreh tawh vak lo a ni tih hriat takin thinrim hmaisenin a chhang a, "Ka pa, engvangin nge zawhna ngai hlir min zawh nawn tlut tlut mai le? Vawi tam tak a chhanna ka pe tawh che a, Chawngzawng ka ti mawlh mawlh a ni lo'm ni? Chu takngial pawh chu i hre thei lo maw Putar?" a ti lêt ta erh a. 

A pa chuan tawngkam khat pawhin a chhang leh ta pek lo! Ngawi rengin a ding thut a, a fapa chuan thinrim takin, "Khawnge kal i tum?" a'n ti zawm zat a. Putara chu a lehhawi a, engmah lo sawi suh ti ni awm takin a kut a phar a. In chhûngah a lût ta daih a.
Reilotêah a lo chhuak leh thuai a. Lehkhabu tereuhtê, a chanchin a ziahna bu (diary) a rawn zakzeh chhuak a. Chu a diary chu a keu mual mual a, a phek duhlai a keu chhuah hnu chuan a fapa chu a pe a, "He thu ka ziah hi ring tawk takin, ka hriat theih ngei turin min han chhiarsak ta che," a ti a.
 Tlangval chuan a pa, Putara diary chu a chhiar ta a; he thu hi a lo inziak a.
"Vawiin chu khua a thiang nuam ngei mai. Vawiin hian ka fapa tlum ber, nimina a kum 3 na pianchamphaphak lawm zo chiah chu park-ah ka lenchhuahpui a. Ka fapa chuan Sava a hmu a, chu sava hming chu min zâwt a. Kei pawhin phûr takin, 'Chawngzawng a nih khi,' tiin ka chhang a. Vawi 21 lai min zâwt nawn a, kei pawhin min zawh zat ang chiah chhanna ka pe ve bawk a. Chu naupang, ka fapa chuan zawhna ngai hlir min zâwt mah se, a rilru put dan tur ka hriatthiampui a, hmangaihna nen ka kuah a, phunnawi hauh lovin lawm takin ka chhang zel a..."
(24112011)

10 comments:

  1. Replies
    1. Rilrua awm ang hi ziah chhuah thiam a harsa! Thu leh hla thiam tak ni ila, hei aia fiah leh chiang zawka ziah hi ka la chak fan!

      Delete
  2. E khai ka nau duhtakin hetianga thu awmze nei tak a ziak hi ka va lawm em aw....

    Tha lutuk. A zirtir a nei tha bawk si. Ka lung i ti hnur em mai a.....

    ReplyDelete
    Replies
    1. Sir, i tilawmawm thei ngawt mai, keini kutchhuak mai mai te min lo chhiar sak peih ve zel a

      Delete
  3. A zirtir a va tha ve le.. Mahni hi kan in hmu lo fo thin a, dawhtheihna hi a pawimawh hle mai, a changin kei pawh ka lotlachham deuh thin. In enfiah lehzual nan ka lo hmang ang e.

    ReplyDelete
    Replies
    1. Kei ngei pawh hian he thuah kher kher hi chuan zir belh tur ka ngah asin!

      Delete
  4. Thianpa, a ngaihnawmin tha ka ti kher mai; zirtir a nei tha bawk nen. Dawhtheihna kan neih te, mahni inenletna kan neih te, midang hriatthiamna kan neihte hi a lo va ngai em! Han ziak zel teh.

    ReplyDelete
    Replies
    1. Ni e, a dam hi han hauh phawt ila, Pathianin rem a tih chuan kan la ziak chho zel ang chu

      Delete