Friday, 15 March, 2013

Fiction: ENGTI ANG CHIAHA THÛK NGE?

(He thawnthu ang deuh hi hriat tawhna neiin i inhre mai thei; buai duh suh! He thawnthu hi English music Video pakhat ka en atanga ka rilru-a lo awm, ka kaihlek leh phuah belh, heti anga lo chhuak ta hi a ni si a! - Angaiha Chhangte)

Thlasik boruak, thawk na zet mai leh zan khaw vawt vur mai chuan tumah a lêm lo a ni ngei ang, zan danga kawtthler lun em em ṭhinte pawh a reh hian a reh tlawk tlawk mai a. A khât tawka motor tlan liam leh zauh ṭhin tih loh chu hmuh tur vang tak a ni. A ni lah tak a, kumin thlasik zet zawng a vin lulai em mai a, tih tur pawimawh neih hranpa loh chuan zana chhuah chu thil peihawm loh tak a ni reng a ni.

Zan dar 7 vel a ni a, Chaltlang chho vel pawh hmun dang ang tho a ni; khaw vawt tuar peih lovin mi zawng zawng an mu bo ta vek emaw tih mai turin a reh a, motor tlan takngial pawh hmuh tur a vang viau. Chanmari lam atanga lo chho vai truck full load, phur rih hmel zet chu a rawn tlan chho ṭuah ṭuah a, truck hnung deuh fê-ah chuan bike pakhat hi a rawn tlan chho ve mek bawk a; thlen hman loh hlau ni awm fahranin chak pawh a chak fu mai.

Bike khalhtu chuan nula hmel pangngai tak hi a phur a, chu nula chuan a hlau rilru viau nge ni, tlangval bike khalhtu chu nghet tak maiin a dawm bawk a. Nula chuan, “Ruata, tlemin tlan muang deuh teh, duh aiin i khalh chak mah mah deuh e,” a ti deuh sek sek a.

Ruata chuan, “Sawmte, Khaw vawt hi a vin si a, nang i dam sam meuh lo nen, vawt I tuar rei lutuk chuan I nat zual phah hlauh ang e,” tiin a chhang sam et a.

An tlan chak angreng bawk a, rei lote-ah truck pawh chu an rawn umphak thuai a. Chutih lai pawh chuan Sawmtei chuan a bialpa Ruata chu khalh muang deuh turin a tur reng bawk a.

Chutia a tur reng si-ah chuan Ruata chuan, “Bawih, kan hmaa truck hi kan lehpelh hun chuan muangchangin kan tlan tawh dawn nia, vawi tam tak kan inphur chhuak tawh a, hei leh chen hi kan inzui tawh bawk a, min ring lo em ni?” a ti a

Sawmtei chuan, “Ka ring lo che pawh a ni lo, tlêma tlan muang deuh turin ka duh mai mai che, ka hlau deuh va,” tiin a chhang a.

Chaltlang dawrkawn an thleng chho va, Bus stand bul kawng zau lai takah chuan Ruata chuan an hmaa vai truck lehpelh tum chuan a bike chu a khalh chak zual sauh a, truck an tlanpel tichuan Bawngkawn lam pan chuan an tlan liam dun ta a.

Bawngkawn lam pana Chaltlang kawng chhuk zet maia an tlan lai leh, truck an lehpelh hnu pawh chuan Ruata chu a tlan chak telh telh mai bawk si, Sawmtei chuan vin zet hian, “Ruata, muangchangin ka khalh tawh ang i tih kha, i speed kha down nghal rawh,” a ti ta hrawk a.

Ruata chuan eng danga chhang ta lo chuan, “Min hmangaih em?” tiin a zawt ta daih a.

“Ruata, Ka hmangaih che, khalh muang deuh tawh teh!”

“Thil eng emaw min han tihsak teh! Chutia i hlau viau a nih chuan ka helmet khum lai hi la chhuak la, nangman khum la, maimitchhing daih ang che, nghet takin min kuah rawh aw!”

Ruata sawi ang chuan Sawmtei chuan Helmet chu a khum ta a, tichuan Bawngkawn lam pan chuan chak zetin an tlan thla ta zel tho va.

A tuka tualchhung chanchinbu te chuan headline inang an nei ta ṭhup mai le! Heti ang hian Vanglaini chuan a tichhuak a:

“BIKE ACCIDENT, A KHALHTU NA TAKIN INHLIAM
Nizan Dt. 11th January 2013 dar 7:15PM khan Chaltlang-a Transport Department Office bul lawkah Karizma Bike sen, MZ 01 E 1803 chuan kopang a su a. He bike hi a neitu K.Lalremruata, Kum 28 S/O K. Lalzika, Khawzawl, tuna Ramhlun N a khawsa mek khalh niin ani hi na takin a hliam a, tunah hian Greenwood Hospital, Bawngkawnah a awm mek. He thu ziah lai hian a nat dan hi chiang taka hriat theih ala ni lo va, Doctor ten uluk taka an enfiah hnu-ah chauh hriat theih a ni ang. Vanneihthlak takin Lalremruata’n Bike-a a phurh Linda Malsawmkimi erawh a hliam na lo hlauh a, first aid pek a nih hnuah damdawiin atangin chhuahtir lehnghal a ni. Bike chetsual chhan hi chiang taka hriat ala ni lo.”

Hun a kal zel a, kar khat lai chu a liam ta. Zawi zawia ṭha leh mai tura beisei a nih laiin Ruata chuan hma a sawn hlei thei lo tlat mai. Pawn lam lang theiah hliam na tak tuar tawh lo mah se, an chetsualna khan a kawchhung lamah nghawng tha lo tak a nei alo ni zawk a. Doctor te thiamna hmanga tihdam chi a ni ta lo!

Natna khuma a mut mek lai chuan Sawmtei chuan a rawn tlawh a, Midang tumah an awm loh lai tak a ni bawk a, zep nei hauh lovin engkim an sawi dun ta. Sawmtei chuan zawhna heti ang hian a zawt ta a:

“Duhtak, engti zia nge ni a? Ni dangah pawh kan inzui chhuak fo va, khati ang khawpa chak khan i khalh ngai lo va, khami zan khan i tlan chak lutuk a, a hlauhawm a ni tih ka hriat avangin tlan muang deuh turin vawi tam tak ka ngen che a, ka thu sawi kha ṭha takin zawm ni la chuan heti ang dinhmunah hian kan ding lo tawp tur a ni a…”

Ruata chu a rawn hawi chhuak a, Sawmtei mitah tak en chung chuan heti hian a chhang a, “Duhtak Sawmte, Ni e, I sawi dik chiah! Khami zan khan ka khalh chak viau a ni tih ka hria a, nidangah khati anga chak khan ka la tlan ngai bik hauh lo. Lo ngaithla la, thil awmdan dik tak ka…”

A sawi zawh hma chuan Sawmtei chuan a lo pawt chat a, “Eng thil awmdan dik tak maw?”

“Sawmte, nang pawhin i la hria ang, i dam sam loh avangin khaw vawt i tuar rei lutuk loh nan tiin hmanhmawh takin ka tlanpui che a. Mahse, i hlau deuh a ni tih ka hriat khan i hlauhna zawng zawng tihreh a, zawi muanga him dam taka tlanpui che pawh ka tum ve reng asin. Ka sawi kha ila hre reng em? Kan hmaa truck tlan kan lehpelh hun chuan muangchangin ka khalh tawh ang ka tih kha? Chaltlang Dawrkawn Bus Stand kan thlen khan kan lehpel ta ngei a, tichuan Bawngkawn lam panin kawng chhuk takah khan kan tlan thla nghal a nih kha…”

“Khami lai khan thil awmdan dik tak ka hrilh duh lo che a, I laka zepruk ka neih vang erawh a ni lo; thil ṭul lo leh awmze nei miah lova i rilru tihphawklek ka hlauh avangin ka hrilh lo che a ni zawk e…”

“Thil awmdan dik tak chu hei hi a ni. Khatia Truck kan lehpelh lai tak khan ka bike-ah khan thil fel lo a awm thut a ni tih ka hre nghal a, tlan muan deuh ka tum khan a brake-in hna a thawk lo asin! Engtin emaw han chingfel mai tur khan hun a awm tawh si lo, kawng chhuk lutuk maiah khan kan tlan thla tawh si a…”

“Bawih, tlan muang deuh tura min ngen laia ka thusawi kha ila hre reng em? Min hmangaih em tih zawhna ka zawh che kha. Tin, nghet taka min kuah tura ka tih lai che khan khami bak kha dam ṭha takin kan inkuah leh tawh ngai dawn lo tih ka hriat avang leh, min hmangaih thu i sawi ṭhin kha khami bak hre leh tawh ngai lo tura ka inchan avangin khati khan ka ti ta zawk asin!”

Sawmtei chuan thil awmdan dik tak a hriat meuh chuan a rilru a kehsawm chiang hle! Dan rual lohvin a biangah mittui a luang ngiah ngiah a, Ruata kuta dawm pah chuan, “Ruata, a lo va mak em! I helmet khum lai phawrh chhuaka keimah min khumtir lai khan heti ang rilru hi ilo pu daih tawh a ni maw? I nunna ai pawha min hmangaihna hi keia thinlung mawl tak hian a thukzia ka lo chhut thiam phak lo a ni,” a ti a, a inhnit hlawp hlawp a.

Ruata pawhin insum har a ti ngang mai, “Sawmte, ngun takin lo ngaithla teh, tunah chuan engmah zep tur a awm lo va, nang pawhin chiang taka engkim i hriat hi a ṭul a ni. Kei hi min han en la, tunah chuan heti mai hi ka ni ta. Pawn lam hi dam vur angin lang mah se, ka kawchhung lamah hian khawvel thiamna hmanga siamṭhat zawh rual loh thil a awm avangin heti hian zawi zawiin kei chu ka liam mai dawn a ni…”

“Eng ang pawhin i kiangah hian awm duh mah ila, chu chu mihringte tih theih piah lam a ni tawh si a. Ni e, An sawi pialral meuh pawh khi i tello chuan a chul deuh rupin ka ring asin! Uluk takin lo inenkawl la, naktukah, ka tel ve tawh ngai lohna tur khawvela i chen hunah pawh ka hmangaihna hi chu nghilh bik lul suh aw. Kei pawhin ka theihnghilh ngai lo vang che. Pialral ram ka pan hunah pawh an sawi Hringlang tlang atangin ka la rawn thlir reng dawn che a nia…”

“Mi ṭhenkhatte rindan hi alo dik a, khawvel piah lam ramah hian pian nawn lehna a awm a nih ngat chuan, chutah ngei chuan natna leh hrehawmna reng rengin a chimbuai phak tawh lohna hmunah hlim taka kan lendun theihna turin ka lo nghak reng ang che,” a ti a

Duh leh duh an intawng a, Nimahsela, an aia thiltithei zawkin an chungah thla a zar ta! An duh emaw, dih lo emaw, ngai chung zela ṭhenna thu an sawi a ṭul ta si a!

Sawmtei chuan a rilruin thil tam tak a ngaihtuah a, mahse, sawi chhuak turin chakna reng a nei tawh lo! “Hmangaihna hi alo va mak em! Engti ang chiaha thûk nge maw lo ni le?” ti rilru reng chung chuan Ruata a hmangaihna chu a bianga mittui luang ngiah ngiah chuan a lantir ta zawk a.

(120120131620)

2 comments: