Monday 25 July 2016

Birthday Present: DUHSAKNA SANGBER

(Kum a liam ta nual mai, September 28, 2012 a ni a, khatih lai khan tu emaw tan birthday present ka ziak ve e ka ti a, ka dahtha ve vang vang a, bopil mai atan ka ui deuh avangin heti hian ka han phochhuak leh hnuhnawh a ni e
 - Angaiha Chhangte)

        Nu pum chhûng ata khaw êng hmu tura lo piang chhuak chhiarsen loh tam tak zingah hian mi famkim pakhatmah kan awm lo tih hi inhrilh chawp kher ngai lova chiang sa a ni. Ni e, Siamtu min duan dan a nih miau avangin kan duh emaw, duh lo emaw, hringnun kawng kan zawh chhûng hian famkim lohna hian nang leh kei hi min hual reng ang; hei hi hringfate chanvo atana Khuanu lo ruat lawk sa a ni si a.

          Ngun takin ngaihtuah teh, mi hei zat zingah hian midang tel lova khawsa thei, mahni chauha nun hmang thei tur mi i hmu em le? Hnai lo ve! Tute pawh hian mamawh kan nei a, chu kan mamawh zawng zawng chu mahni chauha neih theih rual a ni lo.

          Hmânah mihring hi taksa neia din alo nih khan, Siamtu ngei khan mihring chu amah maia awm a phal loh avangin a kawppui tur mi a siamsak a nih kha. Hmân ata tawh vawiin thlengin he tisa pu mihring hian tu emaw chu ala mamawh reng asin. Famkim lohna khawvela kan chen chhûng hi chuan mihring hian famkim ni hmêl a hmu ngai lovang. Chuvang chuan a tlin lohna thup mawi a, finchhuah a, amah tiphuisuitu tur midang a mamawh rêng a ni.



          Mi inang lo, sa inang lo awmkhawmna hmunah hian mimal tin hian kan mamawh leh kan duhzâwng pawh a inang thei ngai lovang a, kan tlin lohna leh fel lohna lai pawh a danglam viau tur pawh a ni rêng a ni. Chuvangin, pakhatin a mamawh em em kha midang tan chuan engmah lo mai pawh a ni thei a; miin eng atan maha an ngaih loh kha tu emaw tan chuan ro hlu ber a ni thei asin.

          Mihring ve tho i ni a, tlin lohna lai tam tak i nei; zep tur a awm lo ve. Amaherawhchu, tunge khawvelah hian mi famkim awm a, felna leh dikna famkima thuam chu? Tumah an awm lo, pakhat tê mah an awm lo! Miin eng angin nge an ngaih che a, eng angin nge an hmuh che tih pawh ka ngai pawimawh lo! Kan dinhmun leh kan nihna azira kan mamawh a inan miau loh avangin midangte ngaihdan hi a pawimawh lo nasa. Tu emaw chuan a mamawh miah lo che ang a, tu emaw chuan eng atan mah a ti lo che pawh a ni thei e. Nimahsela hei erawh hre reng rawh: Tlin lohna leh fel lohna tam tak nei mah la, kei chuan ka mamawh che a, damchhûnga ka kianga awm tur leh hlim ni leh lungngaih ni intawm a, hringnun kawng chhuk chho min zawhpui turin ka thlang che; ka tan I tling tawk!

          Shakespaer te anga thu thiam hmingthang ni ila, ka tana i hlutna hi kum za tam tak liam hnuah pawh thangthar te chena an hriat zui zel tura tlangaupui ka châk asin! John Keats te anga hlaril phuah thiam hmingthang ni ila, tuma hriat ve phak loh i mawina leh i duhawmna thuruk hi hlaril mawi tak hmanga chhamchhuah ka va chak em; i phu ngawih ngawih si a. Nimahsela nang chuan min hrechiang a, mi azawnga tawmkai lo leh laktlak loh ber ka nih avangin phût en-ah pawh i en kher lo vang. Hei tak hi  ka sawi chhuah thiam loh ka tana i hlutna leh ka mamawhna che chu a ni  thung hlauh si a!

          Thiam ka nei lo va, i tan hian tih theih ka nei tlem hle tih i hria e. Mite angin thu thlum leh mawi tak ka hlui ve thei lo che. Chuvangin ka thiam tawk leh phâk tawkin i pianchamphaphak lo thlengah hian duhsakna sang ber ka hlan che a ni tih min lo hriat sak dawn nia. Mawi leh nalh takin tlip ve thiam lo mah ila, ka thinlung zawng zawngin rinawmna thu ka tiam thar leh che. Ka hmangaih che.

(280920121730)

No comments:

Post a Comment