Tuesday, 24 April, 2012

Abraham Lincoln-a’n a fapa zirna sikul Headmaster hnena a Lehkhathawn

Zirtirtu zahawm tak,
 
Ka fapa hian mi zawng zawng hi an insawi angin an awmin an fel famkim vek lo a ni tih hi a hriat ka duh. Mi tenawm ho zingah hian mi chhuanawm tak tak an awm a, Politician ṭawmkai lo zingah pawh hian ram hruaitu ṭha tak tak an inphûm ṭhin a ni tih hi zirtir ang che. Hmelmate zingah pawh hian ṭhian ṭha an awm a ni tih hi zirtir la; a hun a duh rei deuh dawn tih chu ka hria. Mahse, a theih hram chuan chêng nga chhar aiin chêng khat thawhchhuah hi a hlu zâwk a ni tih hi zirtir ang che.

Chak lo zâwka ṭan dan thiam tur leh hnehtu nih nawmzia hre turin zirtir la. Itsikna suala a tlûk loh nan chelh tlat ang che. Bengchheng lova nuih dan chu hrilh la, mi tihduhdah ching takte hi mi rilru duap tak an ni duh tih hi hrilh bawk ang che. Lehkhabu makzia hi hrilh la; vansânga thlâwk ṭhin savate, pârzu dâwt ṭhin khuaite leh tlangram hring dup hmuna pangparte thuruk chu a ngaihtuah chhuah theih nan hun tlêm pe ang che.


Entawn aiin fail a ropui zawk zia hi zirtir la, miten dik lo tiin sawisel mah se, mahni ngaihdana rinawm taka ding nghet ngam turin zirtir bawk ang che. Mi zaidamte bula zaidam a, mi luhlulte bula luhlul ve thiam turin zirtir ang che. A hniak tam lam apiang zui ringawt lo turin lo zirtir hrâm teh. Mi thusawi apiang ngaithla tur leh chûng thu a ngaihthlâk chu thlifim thiam a, a ṭha chauh pawm turin zirtir ang che.

A thluak leh a tihrawl chu a ngam huai ber hnena hralh mai turin hrilh la, a thinlung leh a thlarau erawh a man chhiar ngai lo turin hrilh ang che. Mipui sahawkah beng hupin, amahin dik nia a hriatah chuan huai taka dinga bei ngam turin zirtir hrâm bawk ang che. Zâwldawh takin lo enkawl la, a lakah vuakna tiang lek hreh suh ang che. Fiahna meipui aṭang hian a ni tangkaraw ṭha tak pawh an chher chhuah ṭhin ni! Nghakhlel leh dawhthei thiam turin huaisenna nei se la, mihring zahawmna a hriat theih nan mahni zahawmna hum ngam turin zirtir ang che.

Hei hi thupek khauh tak zawng a ni ngei mai. I theih ang tâwkin hma lo la ang che. Mi tlawngtlaw tak ni mah se ka fapa a ni si a.

(He thu hi chanchinbu pakhatah ka chhiar tawh a, mahse a chanchinbu hming kha ka hre chhuak zo ta hauh lo mai)

5 comments:

  1. Tha khawp mai. Mi pa te hi an ropui thin, tluk loh rim hi an va nam thin tak em aw... Inspiring & challenging deuh deuh lo chhunzawm zel teh.

    ReplyDelete
  2. Lehkhathawn ropui a tling ngei mai.

    ReplyDelete
  3. A tha khawp mai, a lehkhathawn tak tak nimaw? Mahse tunlai angah chuan a apply chi loh khawp ang. Mahni fate vua chu report a awm chuan lunginah tan a hlauhawm lutuk.

    ReplyDelete
  4. Ka chhuah chhawng dawn a niaaaaaaa

    ReplyDelete