Thursday 26 January, 2012

Alison Krauss' TEARDROPS WILL KISS THE MORNING DEW




Hriat reng ka duh lo va, mahse, ka theihnghilh phal si lo. He dinhmun hi mahni duhthlanna-a neih tur ni se, ka thlan loh tur chiang sa a ni. Mahse, kan duh loh ber pawh hi kan chanpual a lo ni thei vek si; hmangaihna vang vek!

Hmân leh tûn danglamna sawi ve fo tur hian tunge ka nih ka inzâwt a. Hmanni lawka piang ve mai ka ni. 'Hmanah chuan' ti ve fo ila, rual û zawkte nuih ka tiza mai mai dawn tih pawh ka hria a. Chuti chung chuan, sawi lo thei lo dinhmunah ka ding lawi si. Midangin min nuihsawhin, min dèu ta viau pawh ni se, a pawi ka ti lêm lo; 'Hmanah kha chuan' ka ti fo vang, ka hlimna neih chhun ni miau hek. Hlim duh lo mihring va awm suh!

Hmân leh tûn hi inzawm tlat, ṭhen hran theih loh a ni an ti fo va. He thu hi a taka tawngtu tan chuan a dik lo ti-a han phat kual chi a ni awzawng lo. Amaherawhchu, kei leh ka dinhmuna ding ve te tan erawh chuan a thlun zawmtu hi a duhawm lo asin - Natna chauh!

Ka ti leh pek ṭhin ang, hun liam tawh hnute hian kan tûn hun leh nakin zêla kan dinhmun tur, hma lam hun a hril an tih ṭhin pawh hi a dikzia hre chiangtu zingah ka tel ve ngei ang. Ngun taka ka ngaihtuah lêt hian, khatih laia ka hlimpui ve thin kha tûn hun atana ka ṭahna hmahruai lek a lo ni tih ka hre chhuak ta miau va.

"When time was young we walk the road together
When love was sweet I meant the world to you
Now comes the sun we'll say good bye forever
And teardrops will kiss the morning dew"

A danglamna sawi dawn ila, a harsa lo - 'hmân leh tûn' tih mai a ni. Tawnhriat ram aṭang erawh chuan a va inhlat tehlul em! Ni e, hmânah kha chuan khawi hmunah pawh chhuak ila, pumkhat ang maiin kan inzui zel ṭhin a nih kha. Khatih lai khan kan inkarah induh tawnna, hmangaihna pâr a vul chik chek a. Uan thu chang lo se, ka engkima engkim, ka khawvel i ni a. Chuti ang bawk chuan kei ngei pawh hi i innghahna leh i hmachhuan ber ka ni ve ṭhin a ni lo’m ni?

Mahse, zan a ral a, chhun a lo inher chhuak ṭhin ang hian, tunah zawng hun a inher liam a, engkim a danglam zo ta. Ui tak chungin 'Mangṭha' ti-a ka thlah liamna tur hun chu khawchhak aṭanga ni lo chhuak chuan a rawn herchhuahpui ta a. Ka chan hi min dáwnpui ve mah teh, a na asin! Zing khua a lo var ang a, chutih hunah chuan zing daifim leh nang ngaih vanga ka mittui hi an far zà leh dawn si a.

"Take me and make me your lover one more time
Close in your arms as before
'Til o'er your shoulder the early morning shines
Then I'll leave you and grieve you no more"

Hmân leh tûn danglamna langsar tak chu maw, suangtuahna ram mawlh mai hi. Hmânah chuan kan suangtuahna khawvel khan nang nena 'tiam tlat e' kan tih hun kan thlir dun ṭhin a nih kha. Mahse, tunah zawng, a tak ram chang thei ngai lo tur ngaihtuahin duhthu ka sâm ta vel mai mai a nih hi maw! Tar kun, khupbih-a tû leh fa enkawl dun tura inbeisei ṭhin khan, tunah chuan zan khat chauh tiin ka au(h) lawm lawm che a ṭul ta si a. Ni, vawi khat chauh ka lam lo hawi lehin, i hmangaihna bân ngei mai khan min han kuah leh teh reng la aw! Zan khat chauh tal rilru thuhmun, inthlahlel takin hun hmang dun leh thei ila, vawi khat chauh tal. Tibuai leh ngai tawh lo tur che-in ka thlah liam thei maithei che asin. Mahse, ka tan chuan vawi khat chauh pawh vana rah ang a ni ta si a.

"Daises need sunshine and roses need rain
So it was all meant to be
A wild bird needs a wings free to take to the wind
And so it was meant for you and me."

Ka tan vul ve tawh lo mah la, i pawimawhna leh ka mamawhna che hi a nep phah chuang hauh si lo. Daisy par chuan a ṭhan len nan ni êng a mamawh a, rose par meuh pawhin ruah tui tel lo chuan a parmawi a chhuah thei hek lo. Chunglêng sava ten sang taka thlifim kara an leu ziai ziai theihna tura thla(wings) an mamawh ang hian, ka nun hian a mamawh che a, ka la thlahlel ngawih ngawih che asin.

Mahse, hmân kha a liam tawh a, a lo lêt leh tawh ngai lo vang. Kir leh dawn tawh lo mah se thlan khur ka thlen ni thlengin nang nena kan hmanlai nun kha ka theihnghilh dawn si lo! Naktukah pawh khua a lo var leh ngei ang a, zingkara daifim an rawn far rualin ka biangah hian nang ngaih vangin mittui a far leh dawn asin. Zing daifim leh nang ngaih mittui a inthlâwp leh tur chu, ka ngaihtuah zui ngam lul lo. Zingṭian lunglen a na leh dawn mang e!

"Teardrops will kiss the morning dew" (13102011)
13 October 2011

9 comments:

  1. Thianpa, a ngaihnawm ka va han ti ve! Rilru zawng zawng nen ka chhiar a, ka lung a lêng vawng vawng mai. Thuziak i thiam ka ti lutuk, ziak mawlh mawlh rawh.

    Alison Krauss hi thiam ka ti asin. A aw tliang mawi lutuk han ngaihthlak vang vang te hi a hahdam ka ti. A hla ka nei tam khawp mai. Baby Mine, Who Can Blame You, A Living Prayer tihte hi nalh ka ti lutuk. 'Who Can Blame You' hi la rawn ziak leh rawh aw.. A hla i neih loh paw'n download la. Chuan, i la ngaihthlak loh takin, 'A Living Prayer' pawh hi lo ngaithla rawh, i ngaihzawn loh takah.

    ReplyDelete
    Replies
    1. Thianpa, i puihna leh i mi fuihna hi ka chhawr ṭangkai nasa a nia. Ni e, i hla sawi pawh hi tunah ka download nghal dawn e

      Delete
  2. A va han ngaihnawm tak em! Ka chhiar a, ka chhiar nawn leh thin. Like mawlh mawlh e.

    ReplyDelete
    Replies
    1. E heu, min lo bihchian sak ve peih chu ka va lawm em!
      @lr, kei aiin i thiam daih zawk tih ka hre chiang a nia aw

      Delete
  3. Ka naute eng tak chu ziak ve ni maw ka lo tia, mahse i thu lak dan a puitling hle mai. Good post. Ka tluklo phawt che!

    ReplyDelete
  4. E heu, Sir (hmun dangah chuan i phal miah lo na a, hetah chuan ka SIR dawn tho tho che) i ngaihawm hle mai. I mi fakna (fakderna pawh ka ti phal lo!) dawn a nuam, a zahthlak viau chungin chu chu ka lawmna tizualtu a ni lawi si!Kawng engkimah ka tluk lohzia che chu nang man i hre chiang ber ang. Min rawn bih sak ve peih ringawt pawh hi a va hlu em! Ka lawm e

    ReplyDelete
  5. A ngaihnawm hle mai. Alison Krauss hi ka duh a mahse he hla kher hi chu ka lo ngaithla ngai lo a.

    ReplyDelete
  6. Kei pawhin ka hriatna chu a la rei lutuk bik lo! Thenkhat hian a nalh an tih thu an sawi hi ka hre leh zauh thin a, ka ngaithla ve chhin a, a duh fal ber pawlah ka trang ta a nih hi maw.. :)

    ReplyDelete
  7. Thu thiam ho hi chu inlo hmeltha lo tlangpui anih hi maw.... Zamuana'n hria se a lawm ve tho in ka ring, i status a i relation chungchang pawh kan buaipui laih laih hlawm kha maw hehe..

    ReplyDelete