Thursday, 26 January, 2012

Ka Buai!

Amah Zirsangzela Hnamte khân hlâ-in a lo châwi a - "Hrilhin sawi thiam ve mai teh se, engtin hril ang maw hringnun hi," tiin. Ni e, a suangtuahna khawvel kha a tak ram lo changin, a hringnun darthlalang khan kan nihna dik tak hi zêp tur awm hauh lovin midangte hmuhtir ta se la, engtin tak kan chanchin hi min puanchhuah sak ang maw? Zaka kun tlawk tlawk tur leh khaw êng pawh hmu ngam tawh lo hial tur khawpa mahni inchhûnga damchhûng hun hmang ral tur hi kan kat nuk mai lo'ng maw? Ka ngaihtuah a, ka buai!

Han ngaihtuah chian tak tak chuan hringnun hi zawhna hlira khat vek niin a hmuh theih rum rum ṭhin. Engati nge, engvangin nge tih tur hi kan nun kawng tinrengah hian a inphûm vek ni-te hian ka hre hial ṭhin a. Chu zawhna chu kei ngei pawh ka inzâwt fo va, mahse, tûn thleng hian ka la chhâng thei chuang lo, ka buai!

Kristian kan ni a, 'nang malsawmna ni ang che' tih thû-te pawh Pulpit tlângah kan sawi kûr ngiai nguai a; mahni inchhûngah nen lam ṭhenkhat chuan kan târ chiai chuai a. Chutih lai erawh chuan a sawitute ngei pawh hian nunpui a, midangte tâna malsawmna nih ahnêkin, engvangin nge mi nun kan tihnat sak fo va, an thinlung kan hliam fo zâwk le? A chhanna tur ka ngaihtuah ṭhin a, ka buai!

Mizo tih leh tlawmngaihna hi inzawm tlat, ṭhen hran theih lo an ti ṭhin a, kan hmai uan ve-na ber niin, hnamdangte pawhin an neih ve loh, Mizo nih tinuamtu kan ti ṭhin, a dik e. Nimahsela, engvangin nge midangten harsatna an tawh lai leh dawmkângtu an mamawh em em laia kei, tlawmngaihna chungchang sawi vul chûk ṭhintu ngei hian ka tlansan a, ka hnungchhawn ṭhin le? Engati nge anni tel lo pawha nghei hauh lo tur hian engmah tham ni lo, mahni intun-nunna tur takngial pawh hah thikûla bei a, bianga thlantui far zawih zawiha thawhchhuah tumtute chanai lehzel pawh lâksak duhna thinlung ka put fo mai le? A chhanna zawngin ka buai!

Ka nun hrim hrimah pawh hian engati nge ka nihna ai sanga ka inhmuh tlat ṭhin a, engvangin nge ka phû tàwkah hian ka lungawi theih miah loh? Kei, chinghne zingah pawh a koham ber hian engvangin nge beram nunnem ber anga lan tuma beram vun sin ka tum tlat ṭhin le? Ka thinlung nihphung hi hriatchian ka tum a, ka buai!

Ka phâk tàwk aia sanga lan ka tum tlatna thinlung hian ka nih tur ang min nihtir phâk lo va, thudik ziktluak lo min chhâkchhuah tir fo bawk. Ka nihna bâka lan mawi ka tumna hian midangte hmuh-ah hmuhsitawmin min siam ṭhin a lo ni. Chuti ang hre reng chung si chuan engvangin nge ka la buai fo mai le? He zawhna chhâng thei lo hian ka buai!

Ka nihna dik tak hi engvangin nge ka thinlung hian a pawm duh tlat loh le? Ka nih ang hian lang chhuak ngam mai ila, buaina a awm lo tur a nia. Buai lohna turah ka buai!

Ni e, zêp tur a awm lo - Ka buai!

(22112011)
Top of Form


No comments:

Post a Comment