Sunday, 15 January, 2012

Rose

Khatia duat tak leh hmangaih taka ka chawm seilenin min tihnat tàk aṭang khan rilru mumal ka pu thei ta hauh lo. A châng chuan ka nihna dik tak hliahkhuh theitu a nih beiseiin mahni rilru lo pui sawi chhuah khut khut a, fiamthu tàk hluai te ka ching a. Dik chiah chuan, keimah ngei hi ka indem a, ka inhua a, ka hmaah hian beiseina meichher a êng ve tawh lo hialin ka hre ṭhin.

Kha rose par, enkawltu leh chawm seiliantu mamawh ngawih ngawih ka chhar chhuah ni khan, heti ang tur a ni ang tih ka ring phak hauh lo va, ka ring phal hek lo. Mahse, hmalam hun hre lo tu mihring hian, a rin dan leh a beisei lâwk anga engkim kal diak diak tura a beisei chuan, natna bâk a hlawh chhuak ngai lo tih erawh ka zir chhuah phah ta zâwk a. Mahse, aw mahse, he zirlai zir chhuak tura ka zinkawng kha a bumboh a, khàm leh súar tam tak paltlang ngai a nih miau avangin ngaihtuah lêt fo ka duh lo! Mahse, (ka ti leh pek ṭhin ang) engtikah mah ka theihnghilh dawn si lo.

Midang angin sum leh paiah chhuan tur ka nei lo va, thiamna leh finna lamah lah an sawi bak sawi belh tur ka hre ngai hek lo. Chuti chung chuan ka theih tâwk leh thiam tâwkin kha rose kha ka enkawl ve ṭhin asin.

A lo ṭhang lian zel a, a parmawi a rawn chhuah meuh chuan a va nalh em! Ka hmu ning thei mawlh lo. Englai pawha thlir veng veng mai kha ka duh ṭhin hial reng a. Min tihlimtu tur a nih ka beisei tlat avangin ka thiamna leh theihna zawng zawng pawh kha rose par tan khan ka hlan pumhlum a, thildang engmah ka ngaihtuah hman lo.

Hun a inher zel a, lo ṭhanglian zelin a sang deuh deuh va, a mawi zual zel a. Ka enkawlna vang a ni ti-a ka lo inchhuan rûk ve veng veng lai khan maw, khatih lai tak khan a ni, engtikah mah dam thei tawh ngai lo tur natna min pek tak zawk chu.

Kha rose kha tun thleng hian a vulna ngaiah a la vul reng a; a parna hmun a la sawn lo. Mahse maw, hun inher zel hian engkim hi a ngai angin a herchhuahpui vek kher lo a lo nih hi! Tun thleng hian ka banphâkah a la awm reng a, ka thliah phakah erawh a vul ve tawh lo. Lo ṭhang lian zelin a sang ta lutuk si maw!

Tunah chuan a lo puitling ta bawk a, enkawl zui zel a mamawh ta lo. Hmangaihna daifima chawm seiliantu meuh pawh min ṭhansan ta. Ni e, min ṭhansan mai a ni lo; a lo seilen a, mawi taka a par theihna tura a mamawh tinreng ngaihtuah sak ṭhintu, a tana a engkim hlantu ban phâk lohvin par a chhuang a. Midang lam hawiin a vul ta zâwk asin. Kei zawng, ka mawl em a, duat taka ka enkawl lai khan a hling lo ṭhang lian ve zel hmu thei tur khawpin ka mit a var tawk lo te pawh a ni ang. Mahse, hei erawh ka khawih phâkah a la dah - a hling!

A par mawina ka thliah phâk tawh loh tura min ṭhansan tàk si-ah chuan, ka ban phâk chhun, a kung tal tiin tlai ni nèmah ka pan ve hram hram ṭhin a. Mahse maw, chu rose par mawi tak kungah chuan hling hriam leh zum tak chiah a awm! Bei nge sei rundung an tih changchawiin ka bèl lui hram ṭhin a; ka hnaih poh leh a hling chuan min chhun na tial tial thung si.

Kha rose par kha mawi teh mah se, a hling pai khan hmangaihtu thinlung a chhun a, a na asin! Kha rose par kha mawi teh mah se, a hling khan hmangaihtu rilru hi a hliam a, a tuam dam leh si lo.....



(16102011)

2 comments:

  1. Thianpa, a ngaihnawm ka ti khawp mai. Thu i thiam si a, i thu leh hlate hi lo dahchhuak zung zung teh khai. Ka blog list-ah ka dah hmak che.

    ReplyDelete
  2. Thianpa TS, i ti lawmawm hle mai. Ni e, phak ang tawk tawkin han ti chho ve beuh beuh ila, a hma ami ai chuan a changtlung deuh hlek turah ngai phawt ang aw :)

    ReplyDelete